Ivory Coast watolewa kiutata

*Italia nao wapigwa na Uruguay
*Suarez adaiwa kung’ata tena
*Colombia wawachakaza Japan

Huku kukiwa na taarifa za Luis Suarez kurudia kitendo cha kung’ata wachezaji wa timu pinzani, pamekuwa na matokeo ya kushangaza katika hatua mechi za makundi.

Ugiriki waliwatoa Ivory Coast kwa penati tata ya dakika ya 90 baada ya kuwa sare ya 1-1. Penati ilifungwa na Georgios Samaras baada ya kudaiwa kuchezewa vibaya na Giovanni Sio.

Ugiriki ndio walianza kupata bao kupitia kwa 
Andreas Samaris kutokana na makosa ya kiulinzi ya beki Cheick Tiote.

Hata hivyo, Ivory Coast walirejesha matumaini ya kusonga mbele pale Wilfried Bony aliposawazisha bada ya kupata pasi ya Gervinho.

Penati iliyotolewa ilionekana kama haikustahili kwa sababu Sio hakucheza rafu mbaya na ni kana kwamba Samaras alipiga mpira na Sio kisha akaanguka.

Baada tu ya matokeo hayo, kocha wa Ivory Coast alitangaza kujiuzulu nafasi yake. Ugiriki sasa watakutana na Costa Rica kwenye hatua inayofuata ya mtoano.

URUGUAY WAWATOA ITALIA

Uruguay wamefanikiwa kusonga mbele kwa kuwatoa Italia katika mechi ngumu na iliyokuwa muhimu kwa timu zote mbili.
Hata hivyo, mechi hiyo ilimalizika kwa utata kwamba mshambuliaji wa Liverpool na Uruguay, Luis Suarez alimng’ata Giorgio Chielini.

Kitendo hicho kilitokea dakika moja tu kabla ya 
Diego Godin kufunga bao pekee ambapo pia ilishuhudiwa kiungo wa Italia, Claudio Marchisio akipewa kadi nyekundu kwa mchezo wa rafu dhidi ya Egidio Arevalo.

Uruguay watakabiliana na Colombia katika Uwanja wa Maracana Jumamosi hii katika mtoano. Italia walitoka uwanjani kwa hasira, na kocha wao, Cesare Prandelli alisema kabla ulikuwa mchezo muhimu zaidi katika muda wote wa tasnia yake na baada ya kushindwa alitangaza kujiuzulu.

Fifa wametangaza kuendesha uchunguzi kubaini iwapo Suarez kweli alimng’ata Chielini. Suarez alipata kumng’ata beki wa Chelsea, Branislav Ivanovic na kupewa adhabu kali ya kukosa mechi kadhaa.

ENGLAND WAMALIZA BILA USHINDI

England wanarejea nyumbani pasipo ushindi wowote baada ya kwenda suluhu na Costa Rica katika mechi yao ya tatu na ya mwisho.
England walitolewa baada ya kupoteza mechi ya mwisho na Italia kufungwa na Costa Rica, ikiwa ni mara ya kwanza wamefanya vibaya zaidi katika zaidi ya miongo mitatu.

COLOMBIA WAWACHAKAZA JAPAN

Colombia wamemaliza mechi zao tatu za makundi wakiwa nafasi ya kwanza baada ya kuwachakaza Japan 4-1.

Japan walihitaji ushindi ili wawe na nafasi ya kusonga mbele lakini walianza kufungwa mapema kwa penati ya Juan Cuadrado kutokana na Yasuyuki Konno kumchezea vibaya Adrian Ramos.

Shinji Okazaki aliwasawazishia Japan kwa mpira wa kichwa kabla ya Jackson Martinez kupiga bao la pili na la tatu kwa Colombia.
James Rodriguez alipachika bao la nne na kumaliza ubishi wa Japan ambao wamefungasha virago kurudi